वैजापूर -स्व.बाळासाहेब ठाकरे समृद्धी महामार्गासाठी स्थानिक महसूल विभागाची अधिकृत संमती न घेता दगड,मुरुमासाठी बोरदहेगाव शिवारातील सरकारी गायरान जमीन गट क्रंमाक १६३ पोखरणाऱ्या कंत्राटदाराचे पोकलँण्ड यंत्रासह तीन टिप्पर तहसीलदार राहूल गायकवाड यांच्या नेतृत्वाखालील पथकाने जप्त करण्याची कारवाई केली.कित्येक दिवसापासून या सरकारी जमिनीत संबधित कंत्राटदाराकडून दिवसरात्र खोदकाम करुन लाखो ब्रास गौण खनिजाचा साठा अवैधरित्या येथून लंपास करण्याचा धडाका दिवसरात्र सुरु होता.स्थानिक स्तरावर कंत्राटदार खोदकामा करिता प्रशासकीय परवानगी आदेश असल्याच्या नावाखाली गायरान जमिनीच्या भुगर्भातील गौण खनिजाचा साठा खोदून वाहनाद्वारे येथून स्थलांतरित करीत असलेल्या प्रकाराची महिती पर्यावरण संवर्धक नागरिक गोकुळ सुराशे यांनी महसूल विभागातील वरिष्ठ अधिका-यांना दिल्यानंतर कंत्राटदारावर कारवाई करण्याचे सूत्र हलले.याठिकाणी तहसीलदार राहूल गायकवाड, मंडळ अधिकारी रिता पुरी, तलाठी महेंद्र गायकवाड, गौण खनिज सुरक्षारक्षक पठाण यांच्या पथक दाखल होताच.याठिकाणाहून खोदकाम करणारे यंत्रासह टिप्पर पळून जाण्याच्या तयारीत होते.पथकातील तलाठी गायकवाड यांनी खोदकाम परिसराचा वस्तुनिष्ठ पंचनामा करुन MH-20EG9504,MH20DT5904, MH20ET6804,विना क्रमाकांचे पोकलँण्ड जप्त करण्याची कारवाई करण्यात आली.जप्त केलेली वाहने पळून जावू नये याकरिता वैजापूर पोलीसांच्या स्वाधीन करण्यात आल्याची महिती मंडळ अधिकारी रिता पुरी यांनी दिली.
